दमिश्कः (सीरिया)। सीरियादेशस्य राजधानी दमिश्कनगरे मङ्गलवासरे युगपत् द्वौ विस्फोटौ अभवताम्। प्रारम्भिकवृत्तानुसारं फ्रान्सदेशस्य राष्ट्रपतेः इमानुएल् माक्रों-महोदयस्य निवासस्थानरूपेण उपयुक्तस्य प्रसिद्धस्य ‘फोर् सीजन्स्’ इति आतिथ्यगृहस्य समीपे विस्फोटकयन्त्रद्वयं स्थापितम् आसीत्।
वार्तासंस्थाभिः उद्धृतानुसारं प्रथमं विस्फोटकं मार्गपार्श्वे स्थिते एकस्मिन् याने स्थापितम् आसीत्, द्वितीयं च विस्फोटकं आतिथ्यगृहस्य समीपस्थे अपशिष्टपात्रे निहितम् आसीत्। उभयोः विस्फोटयोः अनन्तरं सम्पूर्णः प्रदेशः धूमेन आवृतः अभवत्। सुरक्षाबलैः त्वरितं मार्गाः निरुद्धाः, सुरक्षा-व्यवस्था च अधिका कृता।
सीरियागृहकार्यमन्त्रालयस्य वक्तव्येन ज्ञापितं यत् एतयोः विस्फोटयोः कारणेन न्यूनातिन्यूनम् अष्टादश जनाः आहताः अभवन्। तेषु चत्वारः पुलिस-अधिकारी अपि सन्ति। मृतकानां विषये अद्यावधि आधिकारिकं विवरणं न प्रकाशितम्।
फ्रान्सदेशस्य राष्ट्रपतिभवनस्य ‘एलीजे’ इति कार्यालयेन सूचितं यत् राष्ट्रपतिः माक्रों प्रातःकाले एव सीरियाराष्ट्रपतिना अहमद् अल्-शरा-महोदयेन सह भेंटार्थं राष्ट्रपतिभवनं गतवान् आसीत्। अतः विस्फोटसमये सः आतिथ्यगृहे नासीत् तथा च सुरक्षितः अस्ति।
उल्लेखनीयं यत् २०२४ तमे वर्षे असद्-शासनस्य पतनानन्तरं सीरियादेशस्य भ्रमणं कुर्वन् माक्रों यूरोपीयसंघस्य प्रथमः राष्ट्रनेता अस्ति। अस्य यात्रायाः उद्देश्यः उभयदेशयोः सम्बन्धानां पुनर्सुदृढीकरणं तथा पुनर्निर्माणकार्येषु सहकार्यस्य विस्तारः इति कथ्यते।
केवलं कतिपयदिनपूर्वं दमिश्कनगरे न्यायप्रासादस्य समीपस्थे उपाहारगृहे अपि विस्फोटः अभवत्। तस्मिन् आक्रमणे न्यूनातिन्यूनं दश जनाः मृताः, द्वौ च आहतौ अभवताम्। तेन सह एते नवीनविस्फोटौ राजधानीयाः सुरक्षाव्यवस्थायाः विषये पुनः चिन्तां जनितवन्तौ।
मध्यपूर्वप्रदेशे अमेरिकादेशस्य, इज़रायलदेशस्य, ईरानदेशस्य च मध्ये मासमात्रं प्रवृत्तस्य युद्धस्य समाप्तेः अनन्तरं तुलनात्मकशान्तेः वातावरणे माक्रों-महोदयस्य एषा यात्रा सम्पन्ना भवति। दमिश्कभ्रमणानन्तरं सः नाटो-सङ्घस्य शिखरसम्मेलने भागं ग्रहीतुं तुर्कीयादेशस्य आङ्कारानगरं गमिष्यति।
माक्रों-महोदयेन मङ्गलवासरे सीरियाराष्ट्रपतिना अहमद् अल्-शरा-महोदयेन सह द्विपक्षीयसम्बन्धान्, पुनर्निर्माणकार्यम्, निवेशसहकार्यं तथा क्षेत्रीयसुरक्षां विषयीकृत्य चर्चा करिष्यते। अस्य यात्रायां फ्रान्सदेशस्य प्रमुखव्यापारसंस्थानां प्रतिनिधयः अपि तेन सह आगताः सन्ति। तेषु सी.एम्.ए.-सी.जी.एम्. संस्थायाः अध्यक्षः रोडोल्फ् सादे तथा टोटल् एनर्जीस् संस्थायाः प्रमुखः पाट्रिक् पुइयान्ने इत्येतौ प्रमुखौ स्तः। दमिश्कनगरस्य राज्यपालः माहेर् मरवान् इदलिबी-महोदयः अवदत् यत् उपाहारगृहे स्वनिर्मितं विस्फोटकयन्त्रम् (आई.ई.डी.) स्थापितम् आसीत्। अस्मिन् प्रकरणे एकः सन्दिग्धः व्यक्तिः अपि गृहीतः अस्ति।
